(प्रसिद्धीपत्र – प्रकल्प अधिकारी प्रदीप सावंत)
मुंबई : अनुसूचित जाती प्रवर्गातील युवक-युवतींना तांत्रिक कौशल्य आणि उद्योजकीय मार्गदर्शन देण्यासाठी डॉ. बाबासाहेब आंबेडकर संशोधन व प्रशिक्षण संस्था (बार्टी), पुणे आणि महाराष्ट्र उद्योजकता विकास केंद्र (एमसीईडी), मुंबई यांच्या संयुक्त विद्यमाने मोफत तांत्रिक उद्योजकता विकास प्रशिक्षण कार्यक्रम आयोजित करण्यात आल्याची माहिती प्रकल्प अधिकारी प्रदीप सावंत यांनी प्रसिद्धीपत्रकाद्वारे दिली आहे.
तीन तांत्रिक अभ्यासक्रमांची संधी
सदर कार्यक्रमांतर्गत डिजिटल मार्केटिंग (१ महिना), इंडस्ट्रियल ऑटोमेशन विथ आय.ओ.टी. (२ महिने) आणि फोटोशॉप अँड ग्राफिक डिझायनिंग (२ महिने) असे अनिवासी स्वरूपातील अभ्यासक्रम राबविण्यात येणार आहेत. आधुनिक तंत्रज्ञानाच्या युगात डिजिटल माध्यमांची वाढती गरज, उद्योग क्षेत्रातील ऑटोमेशनचे महत्त्व आणि डिझाइन क्षेत्रातील रोजगाराच्या संधी लक्षात घेऊन या अभ्यासक्रमांची आखणी करण्यात आली आहे.
डिजिटल मार्केटिंगमध्ये सोशल मीडिया व्यवस्थापन, ऑनलाईन जाहिरात, ब्रँडिंग, SEO आदी बाबींचा समावेश असेल. इंडस्ट्रियल ऑटोमेशन विथ आय.ओ.टी. मध्ये आधुनिक उद्योगांमध्ये वापरल्या जाणाऱ्या उपकरणांचे प्रात्यक्षिक प्रशिक्षण दिले जाईल. तर फोटोशॉप व ग्राफिक डिझायनिंगमध्ये डिझाईन कौशल्य, फोटो एडिटिंग, लोगो व बॅनर निर्मिती आदींचा समावेश आहे.
“अनुसूचित जाती प्रवर्गातील युवक-युवतींनी तांत्रिक कौशल्य आत्मसात करून स्वयंरोजगार व रोजगाराच्या नव्या संधी निर्माण कराव्यात.” – प्रदीप सावंत, प्रकल्प अधिकारी
तांत्रिक ज्ञानासोबत उद्योजकीय मार्गदर्शन
या प्रशिक्षणाची वैशिष्ट्यपूर्ण बाब म्हणजे तांत्रिक शिक्षणासोबत उद्योजकीय मार्गदर्शन दिले जाणार आहे. उद्योग उभारणीची प्रक्रिया, प्रकल्प अहवाल तयार करणे, शासकीय कर्ज व अनुदान योजना, विक्री कौशल्य, उद्योग व्यवस्थापन, कर व कायदे, लायसन्स प्रक्रिया आदी विषयांवर तज्ज्ञ मार्गदर्शकांकडून सखोल मार्गदर्शन केले जाईल.
तसेच उद्योगांना प्रत्यक्ष भेटी देऊन व्यवसायाची कार्यपद्धती समजावून सांगितली जाणार आहे. प्रशिक्षण पूर्ण केल्यानंतर लाभार्थी स्वतःचा स्वयंरोजगार सुरू करू शकतील किंवा संबंधित क्षेत्रात नोकरी मिळवू शकतील, असा विश्वास व्यक्त करण्यात आला आहे.
पात्रता निकष
प्रशिक्षणासाठी अर्जदाराचे वय १८ ते ४५ वर्षे दरम्यान असावे. तो अनुसूचित जाती प्रवर्गातील असावा आणि किमान १५ वर्षांपासून महाराष्ट्राचा रहिवासी असणे आवश्यक आहे.
डिजिटल मार्केटिंग अभ्यासक्रमासाठी किमान दहावी उत्तीर्ण असणे आवश्यक आहे, तर इंडस्ट्रियल ऑटोमेशन विथ आय.ओ.टी. व फोटोशॉप अँड ग्राफिक डिझायनिंग अभ्यासक्रमासाठी पदवी शिक्षण घेतलेले असणे आवश्यक आहे. स्वयंरोजगार किंवा रोजगार करण्याची तयारी असलेल्या उमेदवारांना प्राधान्य दिले जाईल.
निवड प्रक्रिया
सदर प्रशिक्षणासाठी लाभार्थींची निवड प्रत्यक्ष मुलाखतीद्वारे करण्यात येणार आहे. शुक्रवार, दि. २७ फेब्रुवारी २०२६ रोजी सकाळी ११ वाजता मुलाखतीचे आयोजन करण्यात आले आहे. इच्छुक उमेदवारांनी आवश्यक कागदपत्रांसह सीइएमएस, इंडियन रजिस्टर ऑफ शिपिंग कॅम्पस, आदि शंकराचार्य मार्ग, पवई तलावासमोर, पवई, मुंबई – ४०००७२ येथे उपस्थित राहावे.
आवश्यक कागदपत्रे
अर्जासोबत आधार कार्ड, पासपोर्ट साईज फोटो, जात प्रमाणपत्र, अंतिम सत्राची गुणपत्रिका, शाळा सोडल्याचा दाखला आणि रहिवासी दाखला जोडणे बंधनकारक आहे.
अधिक माहितीसाठी संपर्क
अधिक माहितीसाठी प्रकल्प अधिकारी प्रदीप सावंत (मो. ९१६८६६७१६४) तसेच विभागीय अधिकारी दत्तात्रय थावरे, महाराष्ट्र उद्योजकता विकास केंद्र यांच्याशी संपर्क साधावा, असे आवाहन प्रसिद्धीपत्रकात करण्यात आले आहे.
अनुसूचित जाती प्रवर्गातील युवक-युवतींनी या सुवर्णसंधीचा लाभ घ्यावा आणि तांत्रिक कौशल्याच्या माध्यमातून स्वावलंबी व्हावे, असे आवाहन प्रकल्प अधिकारी प्रदीप सावंत यांनी केले आहे.
